സമാഗമം - കവിത : ടി.കെ.മാറിയിടം

കാലങ്ങളുടെ 

കലുഷ യാനത്തിൽ 

കൈ മോശം വന്നവ.....

കണക്കെടുക്കാനാവാത്തവ......

ഗതകാലത്തിന്റെ 

അങ്ങേച്ചെരുവിൽ 

വിസ്മൃതിയുടെ മഞ്ഞുമറ......

അന്നിന്റെ  പുലരിയിൽ നിന്ന്

ഇന്നിന്റെ സായന്തനത്തിലേയ്ക്ക് 

പ്രയാണ ദൈർഘ്യം 

അളവറ്റത്.....

ഒടുവിൽ -

കാത്തിരിപ്പിന്റെ യുഗാന്ത്യേ,

ചിരാതിലെ  എണ്ണ വറ്റും മുൻപേ 

ദർശനം !....
അപ്പോൾ -

കരുതി വച്ചവ 

കൈമാറാനാവാതെ ,

കൈ വന്നവയെ ,

കൈക്കുടന്നയിൽ 

ഒതുക്കാനാവാതെ,

കണ്ണും കാതും നാവും നഷ്ടമായി,

ശബ്ദവും ശ്വാസവും നിലച്ച പോൽ ,

മിഴിനീർ മറയെ 

തുടയ്ക്കാൻ മറന്ന്,

സ്തബ്ധ നിമിഷങ്ങളുടെ 

ജനിമൃതിയിൽ ,

വിസ്മയത്തിന്റെ ,

സന്ദേഹത്തിന്റെ 

മൂർത്ത രൂപങ്ങളായി ....

സ്വപ്നമോ ?..... 

യാഥാർഥ്യമോ ?.....

 

-നിസ്വനങ്ങൾ..... കവിത -ടി.കെ.മാറിയിടം

ശ്രവിക്കുമോ 

തിരക്കിന്നിടവേളയിൽ 

ഈ നിസ്വനങ്ങൾ ?

നിപതിക്കും മാന്തളിർ ,

കൊഴിഞ്ഞകലും പൂവിതൾ ,

ചിറകിറുന്നു മറയും പൂമ്പാറ്റകൾ ,

നിമിഷ ജന്മച്ചിരി പകർന്നകലും 

നീർക്കുമിളകൾ...

ഓരങ്ങളിൽ ജനിയെടുത്ത് ,

ഓരങ്ങളിൽ നിപതിച്ചു മായും 

അതിഹൃസ്വ ജന്മങ്ങൾ....

അജ്ഞാത സാന്നിദ്ധ്യങ്ങൾ...

അരികു ജീവിതങ്ങൾ....

ശ്രവിക്കുമോ 

തിരക്കിന്നിടവേളയിൽ 

നിങ്ങളുടെ നിസ്വനങ്ങൾ ?...

ജനി മൃതികൾക്കിടയിലെ 

നിമിഷ നിസ്വനങ്ങൾ ?......

മൃത്യു - കവിത - ടി.കെ.

അവനവനജ്ഞാതം ,

അന്യർക്ക് ജ്ഞാതവും 

അതിഥിയാം മൃത്യുവിൻ 

ആഗമനം......

എവിടെ,യെപ്പോളവൻ 

എങ്ങനെയെത്തുമെ -

ന്നറിവീലയിരകളാം 

ജീവികൾക്ക്..... 

നർമ കവിതകൾ ; -രചന : - ടി.കെ. മാറിയിടം

1) പൊയ്‌മുഖധാരികൾ !

വലങ്കാലിലെ ചെളി

ഇടങ്കാൽ കൊണ്ടും , തുടർ-

ന്നിടങ്കാൽ മുട്ടിൽ നിന്നും

വലത്തേ പാദം കൊണ്ടും

തുടച്ചും പുരട്ടിയും

ഉണങ്ങുന്തോറും തേച്ചും

നടിക്കാം മായ്ക്കുമ്പോലെ

മറയ്ക്കാം കാൽമാറ്റത്തെ....!

എന്നിട്ടും പാദം രണ്ടും 

'ശുദ്ധ'മായില്ലെന്നാകിൽ

പാണികൾ രണ്ടുണ്ടല്ലോ

സ്വന്തമാക്കുവാനെന്തും !

ദക്ഷിണാംഗുലികളും

വാമഹസ്തവും തമ്മിൽ

ധാരണയുണ്ടെന്നാകിൽ

കൈമാറാം കളങ്കത്തെ....!

'ശുദ്ധ'മായില്ലാ കൈകൾ

രണ്ടുമേയെന്നാകിലോ ?

ഒട്ടുമേ ഭയക്കേണ്ട ,

ലജ്ജയും വേണ്ടാ തെല്ലും.

വദനം കുനിച്ചോളൂ ,

സ്വീകരിച്ചോളൂ, പിന്നെ

പല്ലിളിച്ചോളൂ, ഒപ്പം

ലോകവുമിളിച്ചോളും ....!

നിന്നിലെ കളങ്കത്തെ

ചൂണ്ടുവാനൊരുങ്ങുന്നോൻ

ചെളിയിൽ മുങ്ങിക്കുളി-
ച്ചീറനായ് നില്പോനല്ലോ....!

നഗ്നനെ നഗ്നൻ ചൂണ്ടി

'നഗ്ന' നെന്നുരയ്ക്കുമ്പോൾ

ആയതിന്നനുഭൂതി

വർണനാതീതം സഖേ ...!

മാനമില്ലെങ്കിൽ എന്തി-

ന്നപമാനത്തെ ഭയം?!..

ആകെ മുങ്ങിയാൽ പിന്നെ

കുളിരില്ലല്ലോ സഖേ....!

--------------------------------------------------------------------------------                   

2) ശരികൾ ........ !

                                                         

ഇന്നലെ :

എൻ ശരിയെനിക്കെന്നും 

നിൻ ശരി നിനക്കെന്നും 

'സുല്ല് ' ചൊല്ലിയ ശേഷം 

നീങ്ങി നാം സമാന്തരം.

ഇന്ന് :

എൻ ശരി നിന്റേതായി ,

നിൻ ശരി എന്റേതുമായ്

'നമ്മുടെ ശരി' യെന്ന് 

മറ്റൊരു ശരിയുണ്ടായ്....!

നാളെ :

നമ്മുടെ ശരിയെന്നാൽ 

'എൻ ശരി' യെന്നായല്ലോ !

നിൻ ശരിയലിഞ്ഞു പോയ് 

'നമ്മുടെ ശരി' ക്കുള്ളിൽ ...!

-----------------------------------------------------------------------------

3 ) മന്ത്രവും തന്ത്രവും !

                                            ചോദ്യം :

മന്ത്രം പഠിച്ചവൻ 

മന്ത്രിയോ തന്ത്രിയോ ?

തന്ത്രം പഠിച്ചവൻ 

തന്ത്രിയോ മന്ത്രിയോ ?

                                           ഉത്തരം :

മന്ത്രം പഠിക്കണം 

തന്ത്രിയായ്  മാറുവാൻ,

തന്ത്രം പഠിക്കണം 

മന്ത്രിയായ് വാഴുവാൻ !

മന്ത്രവും തന്ത്രവും 

ഒരുമിച്ചു നേടുവോൻ 

ആകാം സുമന്ത്രിയോ 

അഥവാ കുതന്ത്രനോ....!   

-------------------------------------------------------------------------------------

           4) ദുർന്യായി  !

ന്യായമന്ന്യായമായ് 

കാണുവോൻ ദുർന്യായി !

അന്ന്യായിയെക്കാളും  

അരസികൻ, താർക്കികൻ  !

കേൾപ്പതിലെല്ലാം ദു-

രർത്ഥം  ഗ്രഹിക്കുവോൻ !

കാണ്മതെല്ലാമവ -

നഹിതം, അസത്യവും !

               

            എൻ ശരിക്കപ്പുറം 

            ശരിയില്ല തെല്ലുമേ !

           എൻ ചെയ്തി തെറ്റാകിൽ 

            ഇനിയില്ല വിശ്വവും !


അന്യായി , ദുർന്യായി
തർക്കം തുടങ്ങുകിൽ
ശീഘ്രം ഗമിച്ചക -
ന്നോളുവിൻ കൂട്ടരേ !

നാളെയിരുവരും
യോജിച്ചു നീങ്ങവേ ,
                                                    ന്യായികൾ നമ്മളോ
                                                    പൊതു ശത്രുവായിടും !!

                                             *******    *******   *******  *********

- കവിത : "വളർച്ച....." -രചന :ടി.കെ.മാറിയിടം

"വളർച്ച....." 

കഴിവുകൾ -

എതിർവാക്ശരങ്ങളെ 

ചിരിച്ചു കൊണ്ടെതിരിടാൻ ....

മൗനം കൊണ്ട് മറുപടി പറയാൻ .....

സംയമനം -

യൗവനത്തിലപ്രാപ്യം....

വാര്ധക്യത്തിലാർജിതം....

വളർച്ച -

മന:ശരീരങ്ങൾ 

ഒപ്പത്തിനൊപ്പം....

ഉത്തമം....

ശരീരം അങ്ങങ്ങ് 

മനസ്സ് ഇങ്ങിങ്ങ്.....

അധമം....

ശരീരമിപ്പുറം....

മനസ്സപ്പുറം.....

ശ്രേഷ്ഠം.....

തിരിഞ്ഞു നോക്കുമ്പോൾ -

പിന്നിട്ട ദീർഘപാതയിൽ 

ആർജ്ജിതം 

വളർച്ചയോ  തളർച്ചയോ ?...

                                             

വിഷുപ്പുലരി - കവിത-ടി.കെ. മാറിയിടം

ഇന്നെന്റെയങ്കണത്തിൽ-കണി

ക്കൊന്നയിൽ പൂവിരിഞ്ഞു;

എന്നെ നോക്കിചിരിച്ചു -കണി

ക്കൊന്നയിൽ പൂങ്കുലകൾ !

പീതവർണ്ണക്കുലകൾ-ചൊല്ലി

പുതിയൊരു  വർത്തമാനം ,

-നീയറിഞ്ഞോ പ്രിയനേ-വിഷു

പ്പുലരിയിതാ വരുന്നു !

കുരുവിയും
       കിളിയുമോതി-ഒപ്പം

പുതിയൊരു വർത്തമാനം ,

-നീയൊരുങ്ങൂ പ്രിയനേ-വേഗം
നൽകണി കാണ്മതിന്നായ് .....!                                          

Articles published by Pratichaya weekly- നുറുങ്ങറിവുകൾ - "പക്ഷികൾ പറക്കുമ്പോൾ" - ടി.കെ.മാറിയിടം

പ്രത്യാശ - - കവിത -ടി.കെ.

കല്ലുകൾ 

എറിഞ്ഞു കൊണ്ടേയിരിക്കാം 

ഏതെങ്കിലും 

എപ്പോഴെങ്കിലും 

ലക്ഷ്യത്തിൽ എത്തിയേക്കാം,

ഫലം കൈകളിൽ പതിച്ചേക്കാം...

വാക്കുകൾ 

ഉതിർത്തു കൊണ്ടേയിരിക്കാം.

ഏതെങ്കിലും എന്നെങ്കിലും 

തുറന്ന കർണ്ണങ്ങളിൽ 

പതിച്ചേക്കാം ,

പ്രതികരണം ലഭിച്ചേക്കാം

വിത്തുകൾ 

വിതച്ചു കൊണ്ടിരിക്കാം 

നിലങ്ങൾ ഊർവ്വരമോ 

                   ഊഷരമോ 

എന്നറിയാതെ....

ഏതെങ്കിലും എപ്പോഴെങ്കിലും 

കിളിർത്തേക്കാം ,

ആഴങ്ങളിലേക്കും 

ഉയരങ്ങളിലേക്കും 

വളർന്നേക്കാം;

എന്നെങ്കിലും 

ആർക്കെങ്കിലും 

ഫലമേകിയേക്കാം...

മതി..... അതു മതി....

വിശ്രമം - കവിത

ഇന്നലെ -

എന്റെ ഫോൺ 

അവിശ്രമം ശബ്ദിച്ചു.

അവർക്ക് പറയാൻ,

അറിയാൻ, 

സാധിക്കാൻ 

ഏറെയുണ്ടായിരുന്നു...

ഇന്ന് -

എന്റെ ഫോൺ നിശബ്ദം !

എനിക്ക് പറയാൻ,

അറിയാൻ , 

ഏറെയുണ്ട്.

പക്ഷെ 

പിറക്കാത്ത മറുവാക്കുകൾ....

നാളെ -

എനിക്കും എന്നോടും 

പറയാൻ,  

അറിയാൻ 

ഒന്നുമില്ലാതാകും .

അങ്ങനെ 

പൂർണ്ണ വിശ്രമം

എന്റെ ഫോണിന് ;

എനിയ്ക്കും......